إحنا بنطلب من الطالب يحترم المعلم… طب مين يحمي المعلم من ولي الأمر؟!
بقلم محمد سعد
مع نهاية الأسبوع الأول من العام الدراسي، وظهور بعض التجاوزات من الطلاب وأولياء الأمور، رجعت أقرأ القرار الوزاري 150 لسنة 2024، وبدأت أدور على إجابة لسؤال مهم:
هل القرار بشكله الحالي قادر فعلًا على مواجهة كل التجاوزات اللي بتحصل داخل المدارس؟
بالنسبة للطالب، القرار واضح جدًا؛ حدد المخالفات ووضع لها عقوبات متدرجة.
لكن وأنا بقرأ، توقفت عند نقطة مهمة:
ماذا يحدث لو ولي الأمر نفسه تجاوز، لفظيًا أو بالفعل، في حق معلم أو مدير مدرسة أو أي من العاملين؟
أنا هنا مش بقول نعاقب الطالب بسبب أبوه أو أمه…
ولا تزر وازرة وزر أخرى.
أنا بتكلم عن ولي الأمر نفسه.
صحيح إن القرار ألزم ولي الأمر بعدم التعرض للعاملين بالمدرسة وعدم التدخل في سير العملية التعليمية، لكن السؤال الأهم:
أين المنظومة الواضحة والمتدرجة للتعامل مع ولي الأمر إذا خالف ذلك؟
وده في رأيي جانب محتاج مراجعة وتحديث، لأن الواقع داخل المدارس أحيانًا بيحتاج أدوات أكثر وضوحًا وحسمًا.
وإحنا شوفنا مؤخرًا إن الحزم ممكن يحقق نتيجة، زي ما حدث في التعامل مع وقائع تكسير الديسكات في بعض المدارس.
فمش لازم نستنى الوزير يتدخل في كل واقعة.
المطلوب إن يكون عند كل مدرسة وإدارة ومديرية إطار قانوني واضح يحمي المدرسة والعاملين فيها.
أنا مؤمن إن المدرسة لازم يكون لها حُرمة…
زي الحرم الجامعي تمامًا.
من حق ولي الأمر يدخل المدرسة، يسأل، يعترض، يشتكي ويتظلم…
لكن مش من حقه يهين أو يهدد أو يتعدى على معلم أو مدير مدرسة.
لأننا لو عايزين الطالب يتعلم احترام المعلم والقانون، لازم الأول تكون كرامة المعلم نفسها محمية بالقانون.
الانضباط مش للطالب وحده… الانضباط مسؤولية الجميع.
والسؤال اللي محتاج إجابة:
هل آن الأوان لمراجعة القرار 150 لسنة 2024 وتحديثه بما يضمن هيبة المدرسة وكرامة العاملين فيها؟
