لماذا قلت تلك المرة : شكرًا لوزير التعليم؟
بقلم د . محمد سعد
من ساعة ما بدأت أكتب عن التعليم بكونى خبيرا متخصص فى شئون التعليم ، لم يكن هدفي الهجوم على مسؤول لمجرد إنه مسؤول، ولا أشكر مسؤول لمجرد إنه مسؤول.
لكن عندما ارى أن هناك خطوة تستحق التقدير… لازم أقول شكرًا.
وشكرا للسيد وزير التربية والتعليم على الاتجاه الجديد في امتحانات الشهادة الإعدادية، وعلى تطبيق نظام البوكليت بجميع المحافظات دون استثناء . ، لأن تطوير الامتحانات مش مجرد تغيير شكل الورقة، نحن بنتكلم عن تأمين الامتحان، وتحقيق تكافؤ الفرص، وقياس مستوى الطالب بشكل حقيقي.
وفيه مقترح يتم بحثه، وهو إن المحافظة ما تستلمش بالضرورة الامتحان اللي شاركت في وضعه، إنما يتم توزيع امتحانات المحافظات بشكل مختلف.
خطوة مهمة جدًا وتستحق الدعم
ولو المقترح ده تم تطبيقه بضوابط، فأنا ارى إنها خطوة مهمة جدًا وتستحق الدعم؛ لأنها ممكن تقلل بشكل كبير فرص تسريب الامتحانات، وتحقق قدر أكبر من تكافؤ الفرص بين الطلاب في مختلف المحافظات.
لكن عندي نقطة أهم:
تأمين الامتحان لوحده مش كفاية. لا بد ان نضمن كمان إن الامتحان نفسه متوافق مع المواصفات العلمية التي يحددها المركز القومي للامتحانات والتقويم التربوي.
وهنا لازم نفتكر هرم بلوم المعرفي ، الطالب مش مطلوب منه يحفظ وبس. الامتحان لازم يقيس، حسب طبيعة المادة ومستوى المرحلة، مستويات مختلفة زي التذكر والفهم والتطبيق والتحليل والتقييم والابداع، مع مراعاة التدرج في الصعوبة والتوازن بين الأسئلة.
يعني ببساطة:
مش كفاية إن الامتحان يتسرب… المهم كمان يكون امتحان عادل. ( تأمين + مواصفات علمية + تدرج في الصعوبة + قياس حقيقي لنواتج التعلم = امتحان يحقق الهدف منه )
ولو نجحنا أن نوصل لتلك المعادلة ، أنا أرى إنه من الممكن عمل نقلة مهمة في امتحانات الشهادة الإعدادية.
أنا دايمًا بقول:
النقد لما يكون القرار محتاج نقد… حق. ، والشكر لما تكون فيه خطوة تستحق الشكر… واجب.
ولذلك كنت دائما أقول بكل وضوح:
شكرًا للسيد وزير التربية والتعليم على الخطوة دي…
والأهم إننا نكمل التطوير ونراجع كل التفاصيل، لأن في النهاية اللي يهمنا هو الطالب وتكافؤ الفرص بين كل الطلاب.
