أكبر عدو للإنسان هو نفسه …. بقلم بسمة دسوقي ..أخصائي إعلام تربوي
.. والإنسان في رحلته المستمرة في الحياة عليه تحدي هذه النفس وألا يتركها تهزمه ، وإلا قد تقضي عليه تماماً وقال تعالي “إِنَّ النَّفْسَ لَأَمَّارَةٌ بِالسُّوءِ “سورة يوسف ..
الآن نصحبكم معنا إلي رحلة قصيرة من مجاهدة النفس لنري من الذي ينتصر في النهاية مع …..
أنا والآنا “
أنا : ايوة جاتلي فكرة تحفة .. أنا مبدعة.. أنا موهوبة
الأنا :ليه يعني أنتي فاكرة نفسك أول واحدة تفكر في الفكرة ديه أكيد في غيرك يعني .
أنا : بس انا بفكر بشكل مختلف عنهم .
الأنا : ههههه مهي دي مشكلة
أنا : مشكلة ليه هو انتي عايزني أبقي نسخة من غيري
الأنا : لا عايزكي متبقيش مُنتقدة ومُخالفة للناس خليكي شبهم تبقي في الأمان .
أنا : بس كده مفيش حد هيتقدم لو فضلنا نقلد بعض ومنخرجش عن التقليد بأفكار جديدة تطورنا
الأنا : ياااه انتي بتبصي لبعيد ومش واقعية خالص.
أنا : لازم يبقي عندنا خيال عشان نرسم مستقبلنا ونتقدم لقدام منفضلش محلك سر … تعرفي أنا قريت جملة حلوة أوي بتقول ” *الشاطحون بأحلامهم هم من يقودونا للمستقبل “.*
الأنا : ههههه تقصدي المجانين .
أنا : أنتي محبطة جداً علي فكرة وعامة حتي لو ده جنان المهم أوصله في النهاية يعني عارفة زمان الي عمل فيلم عن الفضاء وصعود القمر مكنش يعرف أن الخيال ده ممكن يتحقق كان مجرد فكرة خيالية جت للمؤلف بس ده وصل العلماء أنهم يبحثوا ويكتشفوا فعلاً طرق لصعود القمر .
الأنا : مفيش فايدة هتفضلي عايشة في الخيال ده أنا خايفة عليكي مش كل حاجة بتحقق .
أنا :هو أنتي موجودة هنا عشان تنتقديني ؟
الأنا : بنتقدك قبل متخرجي للناس تنتقدك صدقيني الناس مبترحمش بتنتقد أي حاجة جديدة و مُخالفة لفكرهم لمجرد إنها جديدة .
أنا : ايوة بس الناس كده غلط . الأنا : يا خبر أنتي بتخالفي الناس كلها وصراحة كده !
أنا : وايه المشكلة ؟
الأنا : المشكلة ؟ المشكلة إنك هتبقي إنسان وحيد وإنطوائي .
أنا : اه الناس عايزة الي يمشي معهم في القطيع سواء هما صح أو غلط المهم ميخلفهمش .
الأنا : بالضبط
أنا : وانا برفض .. برفض امشي في القطيع .. وأفضل امشي لوحدي .
الأنا : مش خايفة من خسارة الناس؟!
أنا : لأ .. لأن الناس الي انتقدتني وانتقدت قبلي كتير من المبدعين هما الي هيمشوا ورايا يوم منجح ووصل .
الأنا : انتي خيالية ؟
أنا : ده مش خيال ولو رجعنا للتاريخ هتلقي كلامي واقع وحصل طول ما الفكرة موصلتش للنور ونجحت انتي في نظرهم مجنونة لكن أول متنجح الكل هيتلم عليكي ويصقفلك زي نيوتن قبل ميكتشف قانون الجاذبية .. وزي أديسون واكتشافه مركبات تسافر القمر ، و بيل جيتس والبرامج الالكترونية وغيرهم كتير .
الأنا : قدرتي تغلبيني مع أني صعب أتغلب .
أنا : عارفة السر ؟
الأنا : أكيد إنك مجنونة ههههه
أنا : إني مستسلمتش للنقد ولكسر أي حاجة حلوة فيا ممكن توصلني أكون مبدعة .
